Rythm and Poetry ta signifika txeu kuza pa kualker Rapper, y é ka diferenti pa rapper, kriolu… Hip Hop surji ku um nesesidadi di jovens di guetto i di periferia, tinha y, éz atxa soluson na RAP, ki era nesesidadi di fala di kuzas ki staba ta pasa na ses volta y, na ses bairros, ku intuitu di fazi txiga ses opinion na ovidu di kenha ki ka konxeba kel rialidadi. Pa mundo intero sabi di tudu ki éz ta pasaba, afim di fazi algum mudansa, di konta kuzas ki ningém máz ka sta fazeba, y ki mundu intero era ignoranti aserka. Hip Hop é muzika di intervenson, é um manera di fazi mudansa, di fazi um diskurso, um protestu, di fazi kritikas (puzitivu o negativu), di fala di sentimentus y angustias (Rap tem amor, tem sodadi), É DI FLA MA NU STA LI, y ma nu tem algum kuza pa fla, nu tem opinion, y nu tem txeu kuza pa konta y fala, tem txeu kuza ki nu kre pa mudadu y Rap é um forma di nu fla é kal, si bu kre sabi kuze ki jovens ta pensa, pega um Rap y obi.
Pa jovens ki sempre foi rejeitadus y dadu kosta, Rap foi sima um prizenti na dia di natal, foi sima primeru dia di aula ki bu tem ki bai frenti kuadro pa bu apresenta kabesa, é sima ki bu teni um diskursu pa bu fala sobri bo e di bu komunidadi na um ixtádiu ku mundu interu dentu del… Rap é um arma ki jovens podu na mon y éz largadu dentu di um kampu di batália pa éz sobrevivi.
Nu ka podi kulpa kenha ki ta fazi muzikas violentu y ki ta fala de violênsia ora ki úniku kuza ki éz tevi kontatu ku el, se vida interu foi kela, si kela ki é ses rialidadi, si é kela ki é ses vida na dia-a-dia, má um Rapper tem kel puder de fazi ses letras di um forma ki ka ta agridi ningém y ki ta fazi kom ki é obidu, nu ka podi fazi sons so pa divertimentu y pa nu obi na kaza o ku amiguz, konhesidus o familia, nu tem ki sabi ma nu ka ta skodji kenha ki ta bem obi nóz muzika, é podi txiga na lugaris ki nunka nu imajina ma podia txigaba, na obidu di kualker um… algém ki ka konxi kel vida la, y munti dêz tudu kela, é so promovi violênsia o mau influensia, éz ka ta konsigi odjal komu vida di um algém, y kuza ki sta pasa na um zona, kela ki Rappers tem ki sabi trabadja, dexa mundu sabi di um manera kriativu y inteligenti tudo ki é kre fla… dipendendu di modi ki nu transmiti nóz mensajem asi ki algém ta resebi, real skill of a rapper, é sabi trabadja um tema y fazi LYRICS pa fala di kuze ki é kre fala sem distorsi mensajem.
Um Rapper tem ki sabi fala di tudu ki ta pasa ku el sem leba algém a intendi mal e fika mal vistu, y sim konsigi konvensi algém ma kuza ké sta fla é real y sta mesti fazedu algu aserka (si mariadu pa mudadu, se dretu pa insentivadu) puder di um Rapper é grandi, ael é voz di um jerason, ael é mensajem di um nason, rappers tem ki sabi fazi diferensa, manda boka sem ser violentu, y ser violentu ora ki nesesáriu sem agridi ningem.
NU KA MESTI KOBA PA SABEDU MA NU KA KURTI.
By: Bizzy Rodrigues
www.hiphopditerra.com
Sem comentários:
Enviar um comentário